Plantun de Prouvènço

Pèr coumpara dos planto d'encò nostre

Platanthera bifolia & Myosotis laxa

Platanthera bifolia

Orchidaceae

Noms en français : Orchis à deux feuilles, Platanthère à deux feuilles.

Descripcioun :
La doublo-fueio trachis souto lis éuse e li blacas, dins li prado umido e proche dis aigo. Es un Orchis di flour blanco que se recounèis majamen à si dos fueio sus la cambo (fotò). Isto uno meno proche, Orchis chlorantha, que ié sèmblo proun, mai espés, emé de flour mens blanco e lis antèro que s'escarton l'uno de l'autro.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Platanthera
Famiho : Orchidaceae

Ordre : Aspargales

Coulour de la flour : Blanco
Petalo : irreguliero
Ø (o loungour) flour : 1,5 à 2,2 cm
Flourido : Printèms

Sòu : Ca (Si)
Autour basso e auto : 0 à 2200 m
Aparado : Vo
Mai à juliet

Liò : Prado umido - Bos - Palun
Estànci : Mesoumediterran à Subaupen
Couroulougi : Éurasiatico
Ref. sc. : Platanthera bifolia (L.) Rich., 1817

Te-vese-e-t'ame(-fourro-bourro)

Myosotis laxa

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Nom en français : Myosotis gazonnant.

Descripcioun :
Aquéu te-vese-e-t'ame, pulèu rare, trachis en ribo de ribiero, dins li prado umido e li roubino de palun. Emé si péu contro li sepalo se destrìo dis aùtri Myosotis di flour pas trop grosso. Tambèn, i'a ges de bratèio dins l'enflourejado e lou "calice" crèis proun après la flourido.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").